НАВРӮЗ – РУКНИ МУҲИМИ ХУДШИНОСИИ МИЛЛӢ

Санаи 26 марти соли равон дар доираи нақшаи чорабиниҳои муштараки мақомот бо КИМ ҲХДТ дар ҶСК “НБО-Роғун” Наврӯзи байналмилалӣ таҳти унвони “ЭМОМАЛӢ РАҲМОН – ЭҲЁГАРИ НАВРӮЗ ”бо шукуҳу шаҳомати хоса ҷашн гирифта шуд. Дар чорабинӣ муовини якуми Раиси Ҳизби Халқии Демократии Тоҷикистон Неъматзода Маликшо, раиси шаҳри Роғун Саидзода Сунъатулло директор оид ба масъалаҳои иҷтимоии ҶСК “НБО-Роғун” Раҳмонов Анвар, шоири халқии Тоҷикистон Муҳаммад Ғоиб, кормандони Кумитаи Иҷроияи Марказии ҲХДТ, кумитаҳои иҷроияи ҲХДТ дар шаҳру ноҳияҳои тобеи ҷумҳурӣ, кормандони ҶСК “НБО-Роғун” фаъолони шаҳр ва аъзову фаъолони ҳизбӣ иштирок намуданд.

Сараввал меҳмонон аз Неругоҳи барқии обии“Роғун”, ки василаи рушди устувори иқтисоди миллӣ ва пешрафти Тоҷикистони соҳибистиқлол буда, боиси ифтихору сарфарозии ҳар як тоҷику тоҷикистонӣ мебошад, дидан намуданд. Масъулони неругоҳ меҳмононро бо минтақаҳои сохтмон шинос намуда, аз баста шудани маҷрои дарёи Вахш, ки шахсан аз ҷониби роҳбари давлат, муҳтарам Эмомалӣ Раҳмон, савори аспи оҳанин сурат гирифта буд, ёдовар шуданд.

Баъдан, меҳмонон аз намоиши ҳунарҳои мардумӣ ва анаъанҳои наврӯзӣ, ки хоси миллати тоҷик буда, бисёр рангину зебо ороста шуда буд, дидан намуданд.

Сипас, бо сухани ифтитоҳӣ, муовини якуми Раиси Ҳизби Халқии Демократии Тоҷикистон Маликшо Неъматзода, баромад намуда, иброз дошт, ки аз соли 2008 инҷониб ҲХДТ сарпарсти маънавии шоҳкории беназири Пешвои маҳбуби миллат муҳтарам Эмомалӣ Раҳмон, сохтмони Неругоҳи барқии обии “Роғун” буда, роҳбарият ва аъзои он мунтазам дар ин иншооти аср чорабиниҳои гуногунро ба хотири болидагии руҳи кормандони он баргузор намуда, заҳмати шабонарӯзии онҳоро қадршиносӣ менамоянд ва ин кохи нурро, ки боиси ифтихору сарфарозии ҳар як тоҷикистонӣ мебошад, миёни мардуми кишвар ва берун аз он мавриди таблиғу ташвиқ қарор медиҳанд.

Воқеан, Неругоҳи барқии обии “Роғун”, ки дар он имрӯзҳо халқу миллатҳои гуногун заҳмат мекашанд, ба як мактаби бузурги дӯстиву бародарӣ ва сулҳофарӣ табдил ёфтааст боиси ифтихору сарфарозии ҳар як тоҷику тоҷикистонӣ мебошад, ки ин сифатҳо ба арзишҳои Наврӯз тавъам мебошанд.

Чуноне мо медонем, Наврӯз ҷашнест, ки ҷавҳари онро ҳаёту покӣ, муҳаббату садоқат, ваҳдату бахшояндагӣ ва некиву равшанӣ ташкил дода, суннатҳои наврӯзӣ ифодагари ҳамоҳангии байни инсон, табиат ва кайҳон, маҳсуб мешавад. Наврӯзи Аҷам аз замони зуҳури хеш то имрӯз ба ҳамгироӣ ва пойдории равобити миллату қавмҳо мусоидат менамояд.

Боиси ифтихор аст, ки бо талошҳои бевоситаи Асосгузори сулҳу ваҳдати миллӣ, Пешвои миллат, Раиси муаззами ҲХДТ муҳтарам Эмомалӣ Раҳмон Наврӯз дар даврони соҳибистиқлолии кишвари азизамон – Тоҷикистон бо шукӯҳу нусрати хоса дубора эҳё гардида, ба ҷашни ҷаҳонӣ табдил ёфт ва муҳтарам Ҷаноби Олӣ Наврӯзро «Шоҳномаи шаҳриёрони миллат, таърихи зиндаву бедор, пояндагиву ҷовидонӣ, ному нанг, ифтихору шараф ва ҳувияту бақои миллати фарҳангиву тамаддунсозӣ тоҷик» номиданд.

Дар чорабинӣ раиси шаҳри Роғун Саидзода Сунъатулло табрикоти худро ба иштирокчиёни чорабинӣ расонида, зикр намуд, ки таҳти сиёсати оқилонаву хирадмандонаи Асосгузори сулҳу ваҳдати миллӣ – Пешвои миллат, Президенти кишвар муҳтарам Эмомалӣ Раҳмон истиқболу тантанаи Наврӯз, рангу ҷилои нав гирифт.

Дар навбати худ, Шоири халқии Тоҷикистон Муҳаммад Ғоиб шеърҳои ватандорӣ ва наврӯзии хешро қироат намуда, ҳозиринро ба олами рангини тахаюлоти шоирона ворид намуд.

Дар қисмати фарҳангӣ, санъаткорони варзидаи ҷумҳурӣ бо рақсу сурудҳои дилнишин ва мутантан хотири иштирокчиёни чорабиниро болида намуданд.

Дар анҷом, аз номи Кумитаи Иҷроияи Марказии Ҳизби Халқии Демократии Тоҷикистон фаъолону собиқадорони ҳизб бо сипосномаҳо ва туҳфаҳои хотиравӣ сарфароз гардонида шуда, ба чанд нафар аъзои ба тозагӣ ба сафи Ҳизби Халқии Демократии Тоҷикистон пайвастшуда дар фазои мутантан шаҳодатномаҳои ҳизбӣ супорида шуд.

Чорабинӣ дар фазои идона, ҳуввияти миллӣ ва ифтихори баланди ватандорӣ ба анҷом пазируфт.